Starfsmenn Kópavogs kjósa um verkfallsaðgerðir

Starfsmannafélag Kópavogs (SFK) fundar í kvöld og mun greiða atkvæði um það hvort boða eigi verkfallsaðgerðir í annað sinn. Fallið var frá því verkfalli sem boðað var í síðasta mánuði en það átti að hefjast á morgun.

Þeir félagsmenn sem fréttastofa ræddi við í síðustu viku voru óánægðir með að fallið hefði verið frá verkfallinu og með upplýsingaleysi af hálfu félagsins.

Kópavogsbær sendi frá sér tilkynningu fyrr í kvöld þar sem fram kemur að laun félagsmanna SFK yrðu í langflestum tilfellum hærri en sambærileg laun starfsmanna Reykjavíkurborgar ef félagið tæki því tilboði sem samninganefnd Samband íslenskra sveitarfélaga hefur gert því. Tilboðið sé það sama og önnur bæjarstarfsmannafélög hafa samþykkt.

Kraumandi óánægja

Kjaradeilunni var vísað til ríkissáttasemjara í júlí síðastliðnum. Þá höfðu öll önnur bæjarstarfsmannafélög innan BSRB undirritað og samþykkt framlengingu á kjarasamningum en á það féllust félagsmenn SFK ekki. 

Jófríður sagði í samtali við Vísi í lok september að félagsmenn væru verulega óánægðir með laun sín og að „kraumandi óánægja“ ríkti undir niðri. Engin lausn væri í sjónmáli og að bærinn færi í lamasess kæmi til verkfalls. Tæplega 90 prósent félagsmanna samþykktu verkfallsaðgerðir dagana 14., 15., 21. og 22. október næstkomandi og allsherjarverkfall 1. nóvember. Af 710 manna úrtaki kusu 446 félagsmenn.