Skógræktarmenn deila um Teigsskóg

Skógræktarfélag Íslands segir ekki rétt sem Skógræktarfélag Reykjavíkur haldi fram að undirtektir á aðalfundi Skógræktarfélags Íslands vegna tillögu er varðaði Teigsskóg hafi verið dræmar. Hið rétta sé að umræður hafi verið miklar og ósætti hafi verið með óskýrleika í framsetningu tillögunnar.

Vísað er í samþykkt á fundi Skógræktarfélags Reykjavíkur vegna samþykktar Skógræktarfélags Íslands og skógræktarfélaga á Vestfjörðum um teigsskóg. Ranglega er farið með staðreyndir í ályktuninni segja stjórnarmenn Skógræktarfélags Reykjavíkur.

„Fullyrt er í ályktun Skógræktarfélags Reykjavíkur að undirtektir skógræktarmanna við framkominni tillögu á aðalfundi Skógræktarfélags Íslands hafi verið dræmar. Hið rétta er að miklar umræður spunnust á fundinum um tillöguna og voru fundarmenn ekki á eitt sáttir um hana eins og hún var fram sett. Þótti tillagan nokkuð beinskeytt, auk þess sem fundarmönnum fannst ekki nægjanlega skýrt að skógræktarfélögin á Vestfjörðum stæðu að baki ályktuninni,“ segir í athugasemd Skógræktarfélags Íslands. Tillagan hafi hins vegar verið borin fram af stjórn Skógræktarfélags Íslands vegna óska frá aðildarfélögum Skógræktarfélags Íslands á sunnanverðum Vestfjörðum.

„Niðurstaða skógræktarnefndar á aðalfundi Skógræktarfélags Íslands var sú að leggja til að vísa tillögunni til stjórnar S.Í. og var það samþykkt á aðalfundinum. Það er því rangt eins og fram kemur í ályktun Skógræktarfélags Reykjavíkur að endanleg tillaga, sem fékk umfjöllun og afgreiðslu í stjórn Skógræktarfélags Íslands, sé í andstöðu við vilja aðalfundar,“ segir í athugasemdinni. Þorri fundarmanna hafi hins vegar verið þeirrar skoðunar að nauðsynlegt væri að umorða tillöguna, sem síðar var gert, og hún afgreidd af stjórn Skógræktarfélags Íslands með öllum greiddum atkvæðum, eins og áður er getið.

Minnt er á að Skógræktarfélag Íslands séu landssamtök 61 skógræktarfélags víðs vegar um land. Stjórnin leggi sig fram um að hlusta á þau málefni sem heitast brenna á félagsmönnum.

„Skógræktarfélag Íslands virðir mismunandi skoðanir og ályktanir einstakra félaga innan vébanda þess. Í því tilviki sem hér er rakið hlustaði stjórn Skógræktarfélag Íslands á raddir skógræktarmanna og fólksins sem býr við erfið samgönguskilyrði á Vestfjörðum og mat það svo að hagsmunir íbúa á svæðinu væru mikilvægari en að lítill hluti, 1% kjarrlendis í Þorskafirði og Teigsskógi, þyrfti að víkja fyrir betri samgöngum á svæðinu.“