Aðstæður til að komast akandi úr byggð að eldsstöðinni í Holuhrauni hafa hríðversnað eftir því sem bætir í snjó á hálendinu. Ferðalag sem áður tók þrjá tíma tekur nú átta til níu tíma.

Það eru fyrst og fremst vísindamenn og lögreglumenn sem verið hafa á gosstöðvunum undanfarnar vikur og er ekki vitað til þess að neinir fjölmiðlamenn hafi verið á svæðinu síðustu þrjár vikur. Almannavarnir hertu mjög aðgangstakmarkanir með nýjum reglum fyrir tólf dögum og gáfu engin leyfi út til fjölmiðlamanna í tvær vikur á undan meðan reglurnar voru í smíðum.

Og jafnvel þótt menn fái leyfi verður sífellt erfiðara að komast akandi á sérbúnum jeppum á svæðið, sem er í um sjö hundruð metra hæð yfir sjávarmáli. Þeir fáu sem fá leyfi verða allir að aka um Möðrudal á Fjöllum og fara um sérstaka lokunarstöð í svokallaðri Krepputungu.

Á fyrstu vikum eldgossins, áður en fór að snjóa á hálendinu, tók það um þrjár klukkustundir að aka frá Möðrudal að Holuhrauni, en fyrir tveimur vikum fór færið að þyngjast. Fjórir starfsmenn Jarðvísindastofnunar, sem lögðu af stað um sexleytið í gærkvöldi frá Möðrudal, voru ekki komnir í Drekaskála fyrr en um eittleytið í nótt og voru því um sjö tíma á leiðinni.

Þaðan eiga þeir svo eftir að aka að eldsstöðinni, og það er einnig orðið seinfarnara. Lögreglumenn sem óku í gær milli Holuhrauns og Dreka voru um einn og hálfan tíma á þeirri leið, en áður en fór að snjóa var þetta um hálftíma akstur. Snjónum var lýst þannig að hann væri ekki nægilega blautur til að troðast niður og því myndaðist ekki troðin vegslóð. Þetta er því orðinn milli 8 og 9 klukkustunda leiðangur úr byggð að eldstöðinni, ferð sem áður tók um þrjá tíma. 

Menn horfa þó til þess möguleika að það bæti enn í snjóinn svo að fært verði á vélsleðum, sem myndi væntanlega stytta ferðatímann á ný.