Eiginmaður Ástu dæmdur fyrir vörslu barnakláms

Eiginmaður Ástu Gunnlaugsdóttur, sem Hæstréttur úrskurðaði í gær að ætti að snúa til Bandaríkjanna aftur með börn sín tvö, játaði fyrir héraðsdómi í desember 2005 að hafa átt í vörslum sínum 349 barnaklámsmyndir og 17 hreyfimyndir af börnum sem var verið að misnota. Myndirnar fundust í tölvu hans þegar hann fór með hana í viðgerð hjá Tölvulistanum. Hlaut hann þriggja mánaða skilorðsbundinn dóm fyrir brot sín.

Í samtali við DV skömmu eftir dóminn sagðist hann þó einingis hafa játað sök þar sem lögmaður hans hafi ráðlagt honum að gera það. Sjálfur sagðist hann gruna að vinir strippara sem hafði leigt íbúðina hans um tíma hafi komist í tölvuna hans og beri ábyrgð á myndunum.

Ásta, sem var ný orðin tvítug þegar hún kynntist manninum hér á landi, segist hafa frétt af dómnum í gegnum vinkonu sína.

„Vinkona mín sagði mér að hún hafi lesið frétt um hann í DV þegar dómurinn var kveðinn upp. Á þessum tíma þótti DV ekki hafa mikinn trúverðuleika sem fjölmiðill og þegar ég spurði hann út í fréttina í DV sagði hann að þetta væri allt saman misskilningur. Hann hefði útskýrt þetta fyrir dómaranum og dómarinn hefði vísað þessu frá. Þetta sagði hann við alla sína vini og mig. Hann fór ekki í fangelsi þannig að ég trúði því sem hann sagði.“

Eins og kemur fram í Fréttablaðinu í dag snéri Hæstiréttur dómi Héraðsdóms Reykjaness við. Héraðsdómur  hafði áður úrskurðað að það myndi stefna andlegri heilsu barnanna í hættu að vera tekin úr umsjá móður þeirra. Þarf Ásta að snúa aftur í fyrrverandi heimabæ sinn í Poulsbo, Washington, innan tveggja mánaða. Hæstiréttur taldi að þar sem eiginmaður Ástu sagðist getað útvegað henni vinnuvísa í gegnum fyrirtæki þeirra sem framleiðir ís gæti hún unnið þar á meðan mál þeirra færi fyrir dóm og snúið aftur til Bandaríkjanna.

Ásta lýsir í viðtalinu aðstæðum sem hún og börn hennar bjuggu við ytra og segir þær hafa verið óboðlegar. Hún hafi upplifað sig sem nokkurskonar þræl.