„Kennarinn brást hárrétt við“

„Þetta gerðist greinilega ótrúlega hratt,“ segir móðir barns í Brekkubæjarskóla en eldur kviknaði í grunnskólanum á Akranesi á mánudaginn.

Eldurinn kviknaði eftir að ungur drengur kveikti á neyðarblysi í einni kennslustofu á yngsta stigi. Drengurinn hlaut brunasár og var fluttur með sjúkrabíl til Reykjavíkur.

Nemendur í skólanum eru á aldrinum sex til sextán ára en drengurinn er í fjórða bekk.

„Um leið og kennarinn sér reykinn þá hugsar hann til að byrja með um það hvað þetta gæti verið, en í sömu andrá þá er bara kviknað í barninu. Kennarinn brást hárrétt við, stóð strax upp og slökkti eldinn. Því næst hljóp hann með barnið strax upp á sjúkrahús sem er í næsta húsi.“

Móðurinn segir að öll viðbrögð kennarans hafi verið hárrétt.

„Foreldrarnir voru allir kallaðir út í skóla því það varð að veita börnunum áfallahjálp. Við fengum síðan söguna frá kennaranum sem mætti á fund með foreldrunum eftir að hafa farið með drenginn á sjúkrahúsið.“

Starfsfólk skólans náði að stöðva útbreiðslu eldsins á mánudaginn. Hann var þó ekki mikill og vel gekk að ráða niðurlögum hans. Vel gekk reykræsta húsnæðið og tjón á húsnæðinu lítið.

„Drengurinn minn talar mjög mikið um þetta og hefur miklar áhyggjur af stráknum. Hann er mjög óöruggur sem er auðvitað mjög eðlilegt.“

Hún segir að börnin í bekknum hafi séð vel hvað gerðist og hvernig strákurinn var útleikinn eftir brunann.

„Börnin mættu öll í skólann í gærmorgun og kennslan hefur gengið vonum framar miðað við aðstæður. Ég veit aftur á móti að kennaranum líður alveg afskaplega illa og hefur hann vitanlega tilfinningar, rétt eins og börn. Það má ekki gleyma því að þetta er engum að kenna, þetta eru í raun óvitar og þetta hefði alveg eins getað verið mitt barn.“