Báðir markverðirnir í Garðabænum meiddust á höfði

Ingvar Jónsson markvörður Stjörnunnar og Denis Cardaklija markvörður Fram fóru báðir meiddir af leikvelli þegar Stjarnan lagði Fram 4-0 í Pepsí deild karla í fótbolta í dag.

Í báðum tilfellum fengu markverðirnir höfuðhögg. Ingvar reyndi að leika eftir að hugað var af honum en bað um skiptingu nokkrum mínútum síðar.

Ingvar gat gengið sjálfur af leikvelli en Denis þurfti aðstoð til að komast út af vellinum og fór hann beint upp á sjúkrahús með sjúkrabíl skömmu eftir höggið.

Bjarni Guðjónsson þjálfari Fram sagðist ekkert vita hver staðan á honum væri strax að leiknum loknum.

Huga þurfti að Sveini Sigurði Jóhannessyni varamarkverði Stjörnunnar í uppbótartíma en þá fór um Stjörnumenn því Stjarnan er aðeins með tvo markverði á mála hjá sér.

Það skýrist í vikunni hvort Ingvar Jónsson verði klár í slaginn í úrslitaleikinn gegn FH um næstu helgi í Pepsí deildinni.