Lögheimilisskráning Sveinbjargar kærð til sýslumanns

Björgvin E. Vídalín hefur kært lögheimilisskráningu Sveinbjargar Birnu Sveinbjörnsdóttur, oddvita Framsóknarflokksins í Reykjavík, til sýslumanns. Þetta staðfestir Guðmundur Sophusson, sýslumaður í Reykjavík, við Mbl.is.

Ástæða ákærunnar er sú að Sveinbjörg er með lögheimili skráð í Reykjavík, en hefur sagst búa í Kópavogi. Þjóðskrá hefur lögheimilisskráningu Sveinbjargar til athugunar. Mál Sigurbjargar er í hefðbundinni málsmeðferð hjá Þjóðskrá, en að henni lokinni verður ákvörðun tekin um hvort lögheimilisskráning skuli vera óbreytt, eða viðkomandi skuli skráður til lögheimilis annarsstaðar.

Björgvin sagði í samtali við Vísi fyrr í vikunni að hann ætlaði að leggja fram kæru og hefði til þess frest til föstudags. Hann hefur nú lagt kæruna fram.

„Þó hún hafi afdrep í Reykjavík, er það ekki næg ástæða til að hún sé kjörgeng að mínu mati,“ sagði Björgvin sem telur framboð Framsóknarflokksins í Reykjavík af þeim sökum ólöglegt. Framsókn fékk tvo borgarfulltrúa í Reykjavík í kosningunum um liðna helgi.