Grunnskólakennarar fylltu Ingólfstorg

Grunnskólakennarar efndu til baráttufundar á Ingólfstorgi klukkan 10 í morgun og mættu yfir þúsund kennarar á fundinn. Einnig voru haldnir baráttufundir víðar um landið.

Hlé var gert á samningafundi grunnskólakennara og viðsemjenda þeirra hjá Ríkissáttasemjara klukkan sex í morgun eftir 18 klukkustunda samningatörn.

Sólarhrings verkfall grunnskólakennara er því hafið þannig að 4,300 kennarar munu ekki mæta til vinnu í dag, og 43 þúsund nemendur fá ekki kennslu.

Ólafur Loftsson, formaður Félags grunnskólakennara, ávarpaði á fundinn í morgun og las upp áskorun til sveitarstjórnarmanna.

Pollapönk steig á svið og tók nokkur lög en að dagskrá lokinni ganga fundarmenn fylktu liði frá Ingólfstorgi, yfir Austurvöll og að Ráðhúsinu þar sem borgarstjóra verður afhent formleg yfirlýsing frá grunnskólakennurum.

Kennarar voru hvattir til þess að nota kassamerkið #kennaraverkfall og láta vel í sér heyra á samskiptamiðlinum Twitter.

Tweets about '#kennaraverkfall'