„Þetta eru bara flóknir hlutir og mun taka einhvern tíma“

„Það stefndi ekkert sérstaklega í það að við myndum ná fram samningum í gærkvöldi,“ sagði Ólafur Loftsson, formaður Félags Grunnskólakennara, í Bítinu á Bylgjunni í morgun.

Hlé var gert á samningafundi grunnskólakennara og viðsemjenda þeirra hjá Ríkissáttasemjara klukkan sex í morgun eftir 18 klukkustunda samningatörn.

Sólarhrings verkfall grunnskólakennara er því hafið þannig að 4,300 kennarar mættu ekki til vinnu í dag, og 43 þúsund nemendur fá ekki kennslu.

„Þetta hefur vissulega verið að þokast áfram en þetta eru bara flóknir hlutir og mun taka einhvern tíma. Það slitnaði ekkert upp úr viðræðunum í gær, við féllum einfaldlega á tíma.“

Grunnskólakennarar efndu til baráttufundar á Ingólfstorgi klukkan 10 í morgun og mættu yfir þúsund kennarar á fundinn. Einnig voru haldnir baráttufundir víðar um landið.

„Við munum hittast aftur klukkan þrjú í dag og halda áfram viðræðunum. Við erum í raun búinn að ná saman varðandi vinnumat kennara en það á enn eftir að semja um launaliðinn.“