Félag grunnskólakennara segir tafir óviðunandi

Félag grunnskóla, FG, skorar á Samband íslenskra sveitarfélaga og samninganefnd þeirra að ganga strax og af alvöru í að leiðrétta laun félagsmanna FG og ljúka samningum án tafar. Þetta segir í ályktun sem samþykkt var á aðalfundi félagsins sem haldinn var nú á fimmtudag og föstudag. 

Í ályktuninni segir að þær tafir sem orðnar eru á samningaferlinu séu með öllu ólíðandi og að það sé skaðlegt skólastarfi að félagsmenn FG séu samningslausir.

Einnig er vekin athygli á því að samkvæmt skýrslu Samstarfsnefndar um launaupplýsingar og efnahagsforsendur kjarasamninga eru grunnlaun grunnskólakennara um þrjátíu prósent lægri en sambærilega hópa hjá sveitarfélögunum. Félagið segir að við þetta verði ekki unað.

Fundurinn skorar á alla sem láta sig skólastarf varða, ekki síst rekstraraðila skóla, að taka höndum saman um að laun og starfskjör félagsmanna í FG standist ávallt samanburð við kjör annarra sérfræðinga og stjórnenda á vinnumarkaði. Einungis þannig verði skólarnir samkeppnishæfir um vinnuafl og aðsókn í kennaranám mun aukast.