Fullyrða að Tamiflu sé nær gagnlaust gegn flensu

Í nýrri skýrslu er því haldið fram að milljörðum króna hafi verið eytt til einskis um allan heim þegar flensulyfið Tamiflu var keypt í stórum stíl af þjóðum heims til þess að koma í veg fyrir flensufaraldur.

Í Bretlandi einu saman hefur tæpum fimmhundruð milljónum punda verið eytt í lyfið en í skýrslunni sem breska ríkisútvarpið greinir frá í dag er því haldið fram að Tamiflu hafi enga sérstaka kosti umfram venjulegt Paracetamol.

Lyfið hafi því ekkert hjálpað við að stemma stigu við útbreiðslu flensunnar og minnki ekkert líkurnar á því að sjúklingar veikist enn frekar, til að mynda af lungnabólgu. Lyfjarisinn Roche, sem framleiðir Tamiflu hefur þó gagnrýnt skýrsluna harðlega og segir niðurstöður hennar einfaldlega rangar.