Ramos: Enginn óttast Barcelona lengur

Spænski landsliðsmiðvörðurinn Sergio Ramos, leikmaður Real Madrid, er fullur tilhlökkunar fyrir El Clásico annað kvöld þar sem Madrídarliðið tekur á móti erkifjendunum í Barcelona.

Real er í góðum málum á toppi deildarinnar og hefur fjögurra stiga forystu á Barcelona. Sigur myndi svo gott sem gera út um titilvonir Barcelona á tímabilinu.

Real er án taps í 31 síðustu leikjum liðsins og hefur unnið 26 þeirra. Barcelona vann aftur á móti fyrri viðureign liðanna á tímabilinu, 2-1, en þar fór Neymar á kostum og skoraði eitt og lagði upp annað.

„Það er mikið talað um krísu hjá Barcelona en liðið er í úrslitum Konungsbikarsins, í átta liða úrslitum Meistaradeildarinnar og aðeins fjórum stigum frá toppnum í deildinni. Það sem hefur breyst hjá Barca er að óttinn sem lið höfðu fyrir leiki gegn því áður er ekki lengur til staðar,“ segir Ramos í viðtali við spænska íþróttablaðið AS.

„Það yrði mikið áfall ef við töpum leiknum. Clásico er öðruvísi fótboltaleikur. Þetta er leikur sem heimsbyggðin fylgist og sögulegur rígur á milli liðanna.“

Cristiano Ronaldo hefur verið sjóðheitur undarin misseri en hann vann Gullknöttinn í byrjun árs. Ramos er með svör klár aðspurður hvað gerir Portúgalann svona góðan.

„Hann er sjúkur í fótbolta og þess vegna er hann sá besti,“ segir Sergio Ramos.