Wenger útilokar ekki endurkomu Van Persie

Arsene Wenger, knattspyrnustjóri Arsenal, útilokar ekki að Robin van Persie gangi aftur í raðir félagsins í sumar.

Manchester United keypti Hollendinginn fyrir 24 milljónir punda sumarið 2012 og skoraði hann 30 mörk á sinni fyrstu leiktíð á Old Trafford.

Stuðningsmenn Arsenal voru ósáttir við söluna og ekki bætti úr skák að öll mörkin komu sér vel að notum fyrir United á leið sinni að 20. Englandsmeistaratitlinum.

Van Persie hefur verið nokkuð frá vegna meiðsla á tímabilinu en skorað þó sinn skerf af mörkum. Hann er ekki fullkomlega sáttur við þjálfunaraðferðir Davids Moyes og er þrálátur orðrómur í gangi á Englandi um að hann fari aftur til Arsenal í sumar.

„Ég held það sé best að vera ekki að tala um þetta núna,“ sagði Wenger á blaðamannafundi í dag aðspurður um málið og neitaði ekki fyrir að Arsenal myndi reyna fá Hollendinginn til baka eftir tímabilið.

Arsenal tekur einmitt á móti Manchester United í ensku úrvalsdeildinni annað kvöld og þar mætir Robin van Persie aftur á sinn gamla heimavöll. Bæði lið eru særð eftir slæm úrslit um helgina.

„Van Persie er frábær leikmaður. Það er undir okkur komið hvernig við verjumst honum,“ sagði Arsene Wenger.