Von á tilkynningu frá Beckham á morgun

David Beckham mun halda blaðamannafund í Miami á morgun þar sem von er á mikilvægri tilkynningu.

Beckham hefur verið að undirbúa stofnun nýs knattspyrnufélags þar í borg sem mun spila í MLS-deildinni vestanhafs.

Don Garber, yfirmaður deildarinnar, og Carlos A. Gimenez, borgarstjóri Miami, munu vera á fundinum með Beckham. Búist er við því að greint verði formlega frá stofnun félagsins á honum.

Hið nýja knattspyrnulið Miami mun þó ekki spila í MLS-deildinni fyrr en árið 2016 en ljóst er að Beckham hefur stefnt lengi að þessu. Þegar hann samdi við LA Galaxy árið 2007 var klásúla í samningnum um að hann hefði rétt á að kaupa lið að ferlinum loknum fyrir lægri upphæð en gengur og gerist.

Fjölmiðlar ytra segja að Beckham þurfi að greiða 25 milljónir dala til MLS, um 2,9 milljarða króna, en það sé aðeins fjórðungur af þeirri upphæð sem venjulega er greidd.

Það helsta sem hefur staðið í vegi fyrir inntöku félagsins í MLS-deildina er áætlanir um byggingu leikvangs. Búast má við því að það mál sé nánast í höfn nú þegar boðað hefur verið til blaðamannafundar.