Enn eykst ógæfa Fulham

Sheffield United situr í næstneðsta sæti c-deildar en bikardraumur liðsins lifir þó enn góðu lífi.

Hinir rauðu og hvítu sóttu úrvalsdeildarlið Fulham heim í enska bikarnum í kvöld. Um endurtekin leik var að ræða því liðin skildu jöfn 1-1 í fyrri leiknum á Bramall Lane.

Skemmst er frá því að segja að fátt markvert gerðist í leiknum þar til á 119. mínútu í framlengingu. Þá skoraði varamaðurinn Shaun Miller með skalla af stuttu færi og tryggði liðsmönnum Nigel Clouch sigurinn og sæti í 5. umferð keppninnar.

Enn eykst ógæfa Fulham sem vermir botnsæti úrvalsdeildarinnar. Liðið tefldi fram sterku liði í kvöld með fjölmarga landsliðsmenn en tókst ekki að finna leiðina í markið. Lundúnaliðið hefur tapað fjórum leikjum í röð í deildinni en fámennt var á leiknum í höfuðborg Englands.