Sakar Björn Val um blekkingaleik

Guðmundur Kristjánsson útgerðarmaður segir að Björn Valur Gíslason fari bara með hálfan sannleik og reyni að villa um fyrir almenningi, eins og dæmigerður stjórnmálamaður. Björn Valur sagði ástæður uppsagna á frystitogurunum Skálabergi og Brimnesi „ekki að öllu leyti“ veiðigjöldunum að kenna, heldur væri mun frekar breytingum á markaði að kenna.

Forsaga ummæla Björns Vals er sú að Brim hefur sagt upp fjölda sjómanna og selt tvo nýlega frystitogara úr landi. Guðmundur Kristjánsson forstjóri Brims sagði á miðvikudag að „Það sem gerir rothöggið er þetta veiðigjald sem leggst svo ósanngjarnt á bæði rekstrareiningar og sum fyrirtæki. Brimnesið lendir mjög illa í þessu veiðigjaldi.“

Meira en bara veiðigjaldið sem kemur til

„Við sögðum að það væru ýmsar ástæður fyrir þessu og að veiðigjaldið væri eitt þeirra," segir Guðmundur í samtali við fréttastofu. „Björn Valur fer þarna með hálfan sannleik og hann veit miklu betur en að það sem að hann heldur fram sé rétt. Það er eiginlega sorglegt að hann skuli stilla þessu svona upp," bætir hann við.

„Það eru fleiri hundruð manns búnir að missa vinnuna. Það er alvarlegt mál og ekki hægt að tala um það sem einhverskonar grín," segir Guðmundur. Hann segir Björn val ljást að minnast á að til viðbótar við hið sérstaka veiðigjald bætist almennt veiðigjald, sem sé 9,50 krónur á hvert kíló. Þá fylgi frystiskipaútgerð hár launakostnaður og önnur launatengd gjöld. Þessir tveir þættir vegi þyngst í því að Brim hf. sjái ekki lengur hag sinn í að reka frystitogarana.

Segir Björn vera dæmigerðan stjórnmálamann

Guðmundur segir Björn Val fara rangt með að uppsagnirnar séu vegna breytinga á markaði, enda sé mjög góður markaður fyrir frystan fisk í Asíu. „Stærsti framtíðarmarkaður íslensks sjávarfang er Asía og þeir vilja frosinn fisk, sem er glænýr fiskur," segir Guðmundur. Það sé því ekki rétt að ekki sé nægilegur markaður fyrir frosinn fisk. „Sá markaður vill sjófrystan fisk og borgar miklu hærra verð en landfrystan fisk, eins og við seljum gjarnan til Evrópu," bætir hann við.

„Björn Valur er dæmigerður stjórnmálamaður. Hann tekur bara eitthvað eitt atriði og byrjar að fabúlera um það. Hann er að villa um fyrir almenningi og veit miklu betur," segir Guðmundur Kristjánsson að lokum.