Sjómönnum fækkar hratt

Á þriðja hundrað sjómanna hafa misst vinnuna vegna hagræðingar hjá sjávarútvegsfyrirtækjum landsins á síðustu mánuðum. Tveir öflugustu frystitogarar Brim eru á leið úr landi og fékk áhöfn Brimness RE afhent uppsagnarbréf í gær. Blóðtaka fyrir íslenskt samfélag segir formaður félags vélstjóra.

40 skipverjar á Brimnesi RE fengu uppsagnarbréf í gær. Brimnes RE er ásamt Skálabergi RE eitt af glæsilegustu skipum landsins. Þau eru bæði á leið úr landi.

Á undanförnum mánuðum hefur vel á þriðja hundrað sjómanna á frystitogurum landsins fengið afhent uppsagnarbréf. Brim tilkynnti í dag að fyrirtækið hyggist selja Brimnes RE úr landi, líklega til Grænlands. Ekki sé lengur rekstrargrundvöllur fyrir þessa tegund skipa á Íslandi.

„Þetta er eitt besta skipið sem við eigum og sorglegt fyrir okkur Íslendinga að svo sé búið um hnútana að við getum ekki gert út almennileg skip,“ segir Guðmundur Kristjánsson, forstjóri Brim. „Það sem gerir rothöggið er þetta veiðigjald sem leggst svo ósanngjarnt á bæði rekstrareiningar og sum fyrirtæki. Brimnesið lendir mjög illa í þessu veiðigjaldi.“

Aflaverðmæti Brimness á síðasta ári var um tveir og hálfur milljarður. Launatengd gjöld voru rúmur milljarður og verður ríkissjóður af um hálfum milljarði þegar litið er til skattgreiðslu áhafnar Brimness.

Hvað verður gert við kvótann?

„Ætli kvótinn endi ekki á ísfiskara sem veiðir til landvinnslu. Brimnesið hefur hins vegar veitt miklu meira en slík skip þannig að tekjur þjóðarinnar munu minnka,“ bætir Guðmundur við.

Guðmundur Ragnarsson, formaður félags vélstjóra og málmtæknimanna, kallar eftir að óvissu í sjávarútvegi verði eytt. „Við höfum miklar áhyggjur af þessu og þetta er að gerast mjög hratt. Þessir frystitogarar eru að gefa eftir. Um leið og þeim fækkar þá eru mörg störf að fara í land,“ segir Guðmundur.

„Það getur enginn staðið í rekstri í þessari óvissu og það verður að koma krafa á að stjórnvöld að þetta verði leyst í eitt skiptið fyrir öll.“