Lucas frá í tvo mánuði

Enskir fjölmiðlar greina frá því að Lucas Leiva, leikmaður Liverpool, verði frá vegna hnémeiðsla næstu tvo mánuðina.

Leiva meiddist í leik Liverpool gegn Aston Villa um helgina en honum lauk með 2-2 jafntefli. Leiva var tæklaður af Fabian Delph 20 mínútum eftir að hann kom inn á sem varamaður.

Talið er að Leiva hafi skaddað liðbönd í hægra hné og að hann þurfi tvo mánuði til að jafna sig á meiðslunum.

Leiva sleit krossband í hné fyrir rúmum tveimur árum síðan en meiðslin eru ekki svo alvarleg nú. Það er bót í máli fyrir Leiva og Liverpool sem og brasilíska landsliðið.