Arðgreiðslur Lv hafa aldrei verið hærri

Hæstu arðgreiðslur Landsvirkjunar frá stofnun fyrirtækisins hafa verið greiddar í ríkissjóð síðastliðin þrjú ár. Væntingar eru um hærri arðgreiðslur á næstu árum.

Hörður Arnarson, forstjóri Landsvirkjunar, sagði á nýafstöðnum haustfundi fyrirtækisins að Landsvirkjun gerði ráð fyrir að auka arðgreiðslur til ríkisins eftir þrjú til fjögur ár. Á fjórum árum hefur verið fjárfest í nýjum orkumannvirkjum fyrir 50 milljarða króna og skuldir verið greiddar niður um annað eins á sama tíma.

Í samantekt Landsvirkjunar fyrir Fréttablaðið um arðgreiðslur fyrirtækisins frá stofnun þess kemur í ljós að greiðslurnar í ríkissjóð voru rétt tæpir fimm milljarðar árin 2012 til 2014, eða 13 til 14 milljónir Bandaríkjadala árlega. Fyrstu árin eftir hrun greiddi Landsvirkjun ekki arð, en öll árin og stighækkandi á árunum 1997 til 2008, þegar greiðslurnar voru hæstar fram til þess tíma eða 7,8 milljónir Bandaríkjadollara – eða milljarður króna á núvirði.

Hörður segir að arðgreiðslur tímabilsins fyrir hrun þurfi að skoðast í ljósi mikilla fjárfestinga á þeim tíma. „Ég geri ráð fyrir að það sé skýringin, með miklum fjárfestingum dregur úr arðgreiðslugetu. Fyrstu árin eftir hrun studdi eigandinn fyrirtækið með því að taka ekki út arð,“ segir Hörður.

Spurður um hversu háar arðgreiðslurnar gætu orðið segir Hörður að niðurgreiðsla lána gefi vissa hugmynd um arðgreiðslugetu Landsvirkjunar. Ef ekki þyrfti að greiða lán niður, heldur að mögulegt væri að viðhalda þeim, þá hefði arðgreiðslugetan verið 50 milljarðar undanfarin fjögur ár. Þá sé eftir að taka vilja eigandans inn í jöfnuna, og hvort uppbygging eða arðgreiðslur eru forgangsatriði.

Um mitt ár 2011 birti GAM Management hf. [GAMMA] úttekt á efnahagslegum áhrifum af rekstri og arðsemi Landsvirkjunar til ársins 2035. Niðurstöður skýrslunnar voru að greiðslur til ríkissjóðs gætu numið frá 30 milljörðum króna innan fárra ára – háð þróun rafmagnsverðs og fjárfestinga. „Miðað við þá hækkun raforkuverðs sem þar var lögð til grundvallar, og við höfum bent á að sé möguleg, þá hefur það mjög jákvæð áhrif á arðgreiðslugetuna. Sú hækkun lendir aðallega á alþjóðlegum stórfyrirtækjum, og þó fyrstu viðbrögð um hækkun raforkuverðs til almennings séu neikvæð þá verður orkuverð hér áfram lágt.“