Mammon og Þríhnúkaverkefnið

Ómar Stefánsson, bæjarfulltrúi í Kópavogi, lagði í gær fram bókun á fundi bæjarráðs vegna Þríhnúkaverkefnisins, svohljóðandi: „Nú hefur „Mammon“ yfirtekið Þríhnúkaverkefnið að fullu.  Ég tel því rétt að Kópavogsbær losi sig sem fyrst við sinn hlut í Þríhnúkum ehf.,  því  það er ljóst að hagsmunir vatns og náttúru fara ekki saman við það sem virðist vera að keyra verkefnið áfram.  Það er með öllu óskiljanlegt að heilbrigðiseftirlit Hafnarfjarðar- og Kópavogssvæðis skuli hafa samþykkt starfsleyfi til 4 ára þegar óvissa ríkir um framhaldið á svæðinu og rannsóknum ekki lokið. Jafnframt minni ég á samþykktir Kópavogsbæjar í nýsamþykktu aðalskipulagi varðandi þetta svæði.“

Náttúru- og vatnsvernd fyrir borð borin

Ómar lýsir yfir sérstökum áhyggjum af lengd starfsleyfis 3H travel, sem skipuleggur ferðir ferðamanna í gíg Þríhnúka. Hann segir, í samtali við Vísi, að Kópavogur sé ekki lengur aðili að þeim ferðum í gegnum eignarhald sitt í Þríhnúkum ehf. „Einn stjórnarmaður er búinn að stofna fyrirtæki um ferðamannarekstur í tengslum við þetta. Nú er bara verið að græða á virkum dögum og grilla um helgar. Eðlilegt að Kópavogsbær segi sig frá þessu og horfi á þau atriði sem skipta máli. Þarna var allt útroðið þarna síðast, enda vont veður í fyrra. Núna eru uppi hugmyndir að leggja stíg þarna að, sem er jákvætt. Við eigum að snúa okkur að þeim verkefnum sem snúa beint að okkur,“ segir Ómar. Hann bendir á að 3H sé trúistafyrirtæki og sem slíkt þá hafi það ekki heildarhagsmuni að leiðarljósi; svo sem náttúru- og vatnsvernd, en Þríhnúkar eru innan landsvæðis Kópavogs en er þjóðlenda engu að síður. „Við förum með skipulagsvaldið á svæðinu. Fjarsvæði B varðandi vatnsvernd.“

37 þúsund kostar að fara í gíginn

Mikill straumur ferðamanna er á svæðið og samkvæmt grein sem birtist á Vísi í sumar, þar sem Björn Guðmundsson skólakennari gagnrýnir mjög þróun og ástand mála, kemur fram að þangað streymi mikill fjöldi ferðamanna, 50 þúsund á ári og að því sé stefnt, af hálfu fyrirtækisins, að flytja 500 þúsund manns þangað niður í gíginn árlega að tíu árum liðnum. Um sé að ræða þjófstart, að mati Björns; umhverfi þar í grennd þoli engan veginn slíkan átroðning. Samkvæmt heimasíðu 3H Travel kostar ferð í gíginn 37 þúsund krónur þannig að um talsverða fjármuni er að tefla.

Ómar Stefánsson segist nú hafa lagt fram bókun og hann ætlar að sjá hverju fram vindur; hann ætlar að taka málið upp á næsta fundi bæjarráðs.