Tveir stólpar undir verðbólgunni

Ef ekki hefði komið til verðhækkana í heilsugæslu og menntun og fasteignaverð haldist óbreytt síðustu misseri væri hér líklegast lítils háttar verðhjöðnun.

Þetta kemur fram í verðbólguspá Capacent.

„Verðbólga síðustu mánaða stendur því á tveimur stólpum; Hækkun fasteignaverðs og verðhækkun þjónustu sem nýtur opinbers stuðnings eða heyrir beint undir hið opinbera,“ segir þar.

Bent er á að fasteignaliðurinn hafi, milli október í fyrra og í ár, hækkað um 8,8 prósent, menntun um 8,7 prósent og heilsugæsla um 6,6 prósent, en þar að baki sé 14 prósenta hækkun skráningargjalda í háskóla og fimmtungshækkun kostnaðar við þjónustu heimilis- og sérfræðilækna. Þá hafi tannlæknisþjónusta hækkað nokkuð.

Capacent spáir 0,1 til 0,2 prósenta hækkun verðbólguvísitölunnar í þessum mánuði. Gangi spáin eftir lækkar tólf mánaða verðbólga úr 1,9 prósenti í október í 1,7 til 1,8 prósent.