Selur við fyrirsætustörf í Kópavogi

Þessi fallegi selur vakti athygli nærstaddra í Kópavogi um klukkan hálf tvö í dag. Selurinn lá í makindum sínum ofan á steini og virtist njóta sólarinnar sem heiðrað hefur íbúa höfuðborgarsvæðisins undanfarna daga. Talið er að selurinn hafi komist í sjálfheldu á steininum eftir að hæð sjávar í fjöruborðinu lækkaði.

Vilhelm Gunnarsson, ljósmyndari Vísis og Kópavogsbúi með meiru, var á ferðinni í Kópavogi og heilsaði upp á selinn sem var hinn vinalegasti. Lét hann sér fátt um finnast þótt Vilhelm drægi myndavélina á loft og virtist öllu vanur hvað við kemur fyrirsætustörfum.

Björgunarsveitarmenn í Kópavogi komu svo á vettvang og hjálpuðu selnum af steininum og út í Fossvoginn á ný.