Hundrað danspör á öllum aldri

„Þetta hefur gengið alveg eins og smurð vél,“ segir Ellen Dröfn Björnsdóttir, formaður Dansíþróttafélags Kópavogs, um fyrsta dansmót vetrarins sem haldið var í Smáranum í Kópavogi í gær.

Mótið hófst klukkan tíu í gærmorgun og stóð til klukkan átta í gærkvöldi. Um hundrað pör tóku þátt í mótinu en keppendur voru á öllum aldri. Yngstu keppendurnir voru sex ára en þeir elstu ríflega tvítugir. „Það var keppt í bæði ballroom- og latin-dönsum í öllum styrkleikaflokkum,“ segir Ellen.

Fimm erlendir dómarar dæmdu mótið sem hefur verið í undirbúningi síðasta hálfa árið. „Við byrjuðum í maí því við þurftum að bóka flugfar fyrir dómarana á góðum kjörum,“ segir hún.

„Við höfum fengið mikið af sjálfboðaliðum úr félögunum að gera og græja þannig að þetta hafi allt getað tekist“ segir Ellen sem áætlar að í heild hafi um fimmtíu sjálfboðaliðar komið að mótinu með einum eða öðrum hætti.

Þetta er í fyrsta sinn sem mótið er haldið og að sögn Ellenar var mikil þörf á mótinu. „Hingað til hefur fyrsta mót verið haldið í nóvember en okkur fannst við þurfa að hefja önnina fyrr,“ segir hún.