„Hann er breyttur maður“

Mæðgur frá Akureyri flugu í dag til Bandaríkjanna til að heimsækja íslenskan fanga sem setið hefur inni í Greensville-fangelsinu í Virginiu í sextán ár. Þar munu þau hittast þau í fyrsta sinn eftir áralöng bréfaskrif.

Geir Þórisson var dæmdur í tuttugu ára fangelsi fyrir grófa líkamsárás árið 1998, en fullyrt er að enginn Íslendingur hafi setið jafn lengi í fangelsi.

Mæðgurnar Kristín S. Bjarnadóttir og Sóley María Hauksdóttir hafa hvorki hitt Geir í persónu né talað við hann í síma, en eftir að hafa séð viðtal sem Sigmar Guðmundsson tók við hann í Kastljósi árið 2006 hafa þær skrifast á við hann. Sóley var aðeins átta ára þegar hún skrifaði honum fyrsta bréfið.

Í fangelsinu hefur hann verið mjög einangraður frá umheiminum, tölvur eru ekki leyfðar og hann má aðeins hringja í tvö símanúmer. Geir líkur afplánun í september á næsta ári og verður honum strax vísað frá Bandaríkjunum. Hann hyggst hefja nýtt líf á Íslandi.

Hér má sjá lengri útgáfu af viðtalinu við mæðgurnar.