Young frá í tvær vikur

Kantmaðurinn Ashley Young mun ekki leika með Man. Utd næstu tvær vikurnar vegna meiðsla. Sir Alex Ferguson, stjóri Man. Utd, hefur staðfest það.

Young meiddist á ökkla í leiknum gegn Man. City og mun missa af leikjunum gegn Stoke, West Ham og Aston Villa.

"Ashley verður frá í tvær vikur eftir þetta högg sem hann fékk á ökklann," sagði Ferguson.

Nemanja Vidic er á batavegi en hann var meiddur á kálfa og Jonny Evans ætti að vera orðinn klár fyrir leikinn gegn Stoke á sunnudag.

Stjórinn býst einnig við Paul Scholes á æfingu á mánudag en hann hefur verið frá síðan í lok janúar vegna hnémeiðsla.