Handtökuskipun breytir engu um afstöðu íslenskra stjórnvalda

Ákæra bandarískra stjórnvalda á hendur uppljóstraranum Edward Snowden og handtökuskipun breyta engu um afstöðu íslenskra stjórnvalda til málsins. Enn hefur engin formleg beiðni borist frá honum um að fá hæli hér á landi.

Snowden hefur farið huldu höfði í Hong Kong síðan hann ljóstraði upp um söfnun bandarískra stjórnvalda á kerfisbundinn hátt á síma- og netnokun fjölda fólks. Í gær gáfu bandarísk stjórnvöld út ákæru á hendur honum fyrir njósnir og þjófnað og misnotkun á eigum ríkisins. Þau hafa farið fram á það við yfirvöld í Hong Kong að þau handtaki Snowden en framsalssamingur er í gildi á milli landanna tveggja. Yfirvöld í Hong Kong vilja ekkert gefa upp um hvort að orðið verði við beiðninni. Ljóst er að ef Snowden verður handtekinn þá getur liðið langur tími þar til hann verður sendur úr landi.

Snowden hefur sagt að hann hafi áhuga á því að koma hingað til lands. Bæði Ögmundur Jónasson þingmaður Vinstri-grænna og Birgitta Jónsdóttir þingmaður Pírata vilja að Alþingi fjalli um málefni Snowden og njósnir Bandaríkjamanna.

Enn hefur engin formleg beiðni hefur borist frá Snowden um að fá pólitískt hæli hér á landi. Hanna Birna Kristjánsdóttir innanríkisráðherra sagði í fréttum okkar í vikunni að hún yrði að berast svo hægt væri að fjalla um málið. Hann fengi enga sérmeðferð hjá íslenskum stjórnvöldum. Ekki fékkst viðtal við ráðherrann í dag en í samtali við fréttastofu sagði aðstoðarkona hennar Þórey Vilhjálmsdóttir að ákæra á hendur Snowden breytti ekki afstöðu ráðherrans í málinu.