Rangt að vera með munntóbak í viðtali

Munntóbaksnotkun Lars Lagerbäcks, þjálfara karlalandsliðs Íslands í knattspyrnu, hefur ekki farið fram hjá landanum.

Í viðtali við Fréttablaðið haustið 2011 sagðist hann hafa notað tóbak í vör frá fimmtán ára aldri en hafði þá nýlega látið af ósiðnum. Hann fái sér þó tóbak endrum og sinnum.

Í viðtali við Stöð 2 fyrir leikinn gegn Sviss á dögunum vakti athygli að efri vör hans var úttroðin. Hann segist hafa gert mistök.

„Það var heimskulegt og auðvitað átti ég ekki að vera með munntóbak í viðtali,“ segir Lagerbäck. Hann sé vel meðvitaður um herferð KSÍ gegn tóbakinu.

„Þú átt auðvitað ekki að neyta eiturlyfja á neinu formi. Fólk drekkur hins vegar áfengi, reykir sígarettur og þar fram eftir götunum. Þannig er lífsins gangur. Það er enginn fullkominn.“

Nánar er rætt við landsliðsþjálfarann í ítarlegu viðtali í Fréttablaðinu. Viðtalið má lesa hér.