Losa úrgang í sjóinn

Áratuga hefð hefur skapast fyrir því að urða slóg frá að minnsta kosti tveimur fiskverkunum í Þorlákshöfn með því að sturta því fram af bjargbrún skammt við þorpið. Illa gengur að koma í veg fyrir þetta lögbrot þótt Heilbrigðiseftirlit Suðurlands hafi reynt það í árafjöld og bæjaryfirvöld hafi einnig ýtt á eftir því að lausn finnist á málinu.

Gunnsteinn R. Ómarsson, nýráðinn bæjarstjóri Ölfuss, segir þetta vera skýrt lögbrot sem ekki verði látið líðast.

Birgir Þórðarson, heilbrigðisfulltrúi á umhverfis- og mengunarvarnarsviði hjá Heilbrigðiseftirliti Suðurlands, segir að komið hafi verið á samstarfi við Matís og Atvinnuþróunarfélag Suðurlands með það fyrir augum að nýta fiskafganginn til að framleiða áburð. Hafi það gengið með ágætum um sinn en svo fór aftur að bera á því að afgangurinn færi fyrir björg. Mikil mávamergð bíður þar máltíðar sinnar og nokkur ummerki um urðunina eru að finna á svæðinu. Hann segir urðunarmál þetta hafa beinst að fyrirtækjunum Auðbjörg og Hafnarnesi.

Ármann Einarsson, framkvæmdastjóri Auðbjargar, segir að fyrirtækið sturti ekki niður slóginu. „Við erum ekki að sturta þessu niður en ég veit ekki hvað þeir gera við þetta hjá Íslenska gámafélaginu,“ segir hann og kemur það heim og saman við málflutning Birgis.

Jón Þórir Frantzson, forstjóri Íslenska gámafélagsins, segir menn þó eitthvað vera að ruglast á fyrirtækjum. „Við gerum þetta ekki og Auðbjörg er ekki í viðskiptum hjá okkur,“ segir hann. Hann segir hins vegar brýna þörf á urðunarstöð á Suðurnesjum. „Það er alveg ljóst að ef uppfylla á allar þær kröfur sem gerðar eru þá verður slík stöð að koma til. Það er ekki hægt að menn verði að keyra jafnvel hundruð kílómetra með nokkur tonn af slógi.“

Sigurður Jónsson, skipulags- og byggingarfulltrúi Ölfuss, segir að það sé heilbrigðiseftirlitsins en ekki bæjaryfirvalda að beita valdi í þessu máli. Hins vegar sé mikilvægast að ráða fram úr vandanum og finna hagkvæma lausn þar sem engin bræðsla sé á svæðinu. Ármann segir að verið sé að vinna með slíka lausn, eins og Birgir gat um, en framkvæmd hennar hafi tekið lengri tíma en vænst hafi verið.