Skúrinn brann til grunna

Skúr brann til grunna á bænum Skálatanga við Innra-Hólmsveg í Hvalfjarðarsveit aðfaranótt sunnudags. Enginn var á bænum þegar eldsins varð vart en vegfarandi sem átti leið hjá hringdi í Neyðarlínuna. Þegar slökkviliðsmenn komu á staðinn var skúrinn alelda og lítið var hægt að gera til að bjarga honum.

Þetta segir Valdimar Sólbergsson, slökkviliðsstjóri slökkviliðs Akraness og Hvalfjarðarsveitar, í samtali við Skessuhorn. Að hans sögn var ekkert rafmagn á skúrnum. Slökkvistarf tók um tvö tíma.

Unnið er að rannsókn á tildrögum brunans.