Segir fjórflokkinn verja sitt

Smærri framboðin vilja að stjórnmálaflokkarnir nái saman um að lækka það hámark sem stjórnmálaflokkarnir verja til auglýsinga fyrir kosningar. Líkt og Fréttablaðið greindi frá í gær hafa flokkarnir ekki náð saman um slíkt þak.

Fulltrúar nokkurra framboða hittust, að ósk Samfylkingarinnar, fyrir rúmri viku. Þar var rætt um að setja þak á kostnaðinn, en slíkt hefur verið gert í síðustu þremur kosningum. Í alþingiskosningunum 2007 var þakið 28 milljónir króna á flokk, fjórtán milljónir í kosningum til Alþingis árið 2009 og ellefu milljónir í sveitarstjórnarkosningum árið 2010.

Ásta Hafberg, fulltrúi Dögunar, segir að fjórflokkurinn svokallaði, Sjálfstæðisflokkur, Framsóknarflokkur, Samfylking og Vinstri græn, hafi ekki mátt heyra á það minnst að lækka þakið. Atli Fannar Bjarkason, framkvæmdastjóri Bjartrar framtíðar, lagði til að það yrði lækkað niður í þrjár milljónir. Dögun studdi það en stakk upp á að hafa þakið 3,5 milljónir.

Ásta segir að svo virðist sem einhugur ríki um málið svo lengi sem það sé á forsendum stóru flokkanna.