Heyrnarlausir fá ekki túlka: "Við upplifum okkur eins og í fangelsi"

Félag heyrnarlausra hefur lýst þungum áhyggjum af þeirri stöðu sem upp er komin í bréfi til menntamálaráðherra, sem hefur tilkynnt að ráðuneytið hafi ekki tök á að mæta þörf fyrir aukið fjármagn til túlkaþjónustu. „Þetta er mjög alvarlegt mál. Þetta hefur miklar hindranir í för með sér og flestir tala um að þeir upplifi þetta eins og þeir séu bara settir ofan í skúffu, eða í fangelsi, þangað til þetta mál leysist. Við erum virkir þjóðfélagsþegnar og viljum vera það. Við erum í vinnu og borgum skatta eins og hver annar. Við viljum taka þátt í lífi barnanna okkar og vera jafngild öðrum í samfélaginu,“ segir Heiðdís Dögg Eiríksdóttir, formaður Félags heyrnarlausra.

Þjónustu með textasíma var nýlega lokað og nú hefur nýtilkomnum myndsíma einnig verið lokað, þar sem sjóðurinn sem nú er uppurinn var notaður til að fjármagna hann. Heyrnarlausir hafa því enga möguleika á að hringja sem skapar oft vanda í daglegu lífi.

Heiðdís segir vanta sex til tíu milljónir til að tryggja túlkaþjónustu út árið. „Ég vil biðja um að þetta verði leyst strax og þetta verði leyst til frambúðar,“ segir hún.

Eiginmaður Heiðdísar, Arnar Ægisson, sem einnig er heyrnarlaus, var að hefja störf á nýjum vinnustað en þegar hann bað um túlk til að hjálpa sér að komast inn í nýju vinnuna, fékk hann þau svör að sjóðurinn væri tómur. „Það var rosalega óþægilegt að vera kominn á nýjan vinnustað og í nýjar aðstæður þar sem ég þekkti engan. Ég vissi ekkert hvar ég ætti að byrja eða hvað ég ætti að gera,“ segir hann.

Arnar segir túlkaþjónustu kosta um tíu þúsund krónur á tímann. „Þannig að ég átti ekki peninga fyrir þessu. Ég gæti þurft túlk oftar en í þetta eina sinn og ég ræð ekki við það,“ segir hann.

Að taka túlkaþjónustu af heyrnarlausum, má líkja við það að taka hjólastól frá farlama einstaklingi. Og þá má spyrja sig, er það ásættanlegt?