Missir ekki svefn yfir sambandsslitunum

André Villas-Boas, stjóri Tottenham, segist ekki missa svefn yfir því að sambandi sínu við Jose Mourinho, kollegi hans hjá Chelsea, sé lokið.

Tottenham tekur á móti Chelsea í hádegisleiknum í ensku úrvalsdeildinni á morgun. Spennan er löngu byrjuð að magnast fyrir slaginn enda um erkifjendur að ræða auk þess sem stjórar liðanna voru afar nánir. Svo er ekki lengur.

Villas-Boas segir sambandsslitin mega rekja til þess þegar félagarnir fyrrverandi tóku við stjórnartaumunum hjá Internazionale árið 2008. Villas-Boas hafði verið aðstoðarmaður Mourinho bæði hjá Porto og Chelsea þar sem góður árangur náðist. Portúgalinn vildi aukið hlutverk hjá Inter en Mourinho sagði nei.

„Samband okkar var frábært bæði faglega og persónulega en svo er ekki lengur,“ sagði Villas-Boas á blaðamannafundi í gær. Hann telur gagnkvæma virðingu fyrir hendi og enginn geti neitað forsögu þeirra. Sambandið sé þó gjörólíkt því sem það var.

„Ég missi samt engan svefn yfir því.“

Villas-Boas ákvað því að söðla um sumarið 2009 og halda á ný mið. Hann tók við Academica í portúgölsku deildinni en liðið var í skelfilegum málum á botni deildarinnar og án sigurs í október. Villas-Boas stýrði liðinu í 11. sæti og undanúrslit bikarsins. Árið eftir tók hann við Porto og bætti árangur Mourinho með liðið í deildinni frá 2004.

Villas-Boas tók svo við Chelsea sumarið 2011 en entist aðeins átta mánuði í starfi. „Mér er sama um Chelsea,“ sagði Villas-Boas. Portúgalinn ber Roman Abramovich, eiganda Chelsea, ekki vel söguna. Hann hefur sakað hann um að brjóta loforð sitt með því að segja sér upp.

Þó ekki sé endilega tilefni til þess að tala um fjandskap milli stjóranna þótt samband þeirra sé ekki gott gildir annað hjá forsvarsmönnum félaganna. Skemmst er að minnast þess þegar Chelsea „stal“ brasilíska miðjumanninum Willian frá Tottenham sem taldi sig hafa svo gott sem tryggt sér þjónustu kappans. Þá reyndi Villas-Boas að fá Juan Mata til Spurs en án árangurs.

Leikur Spurs og Chelsea á White Hart Lane hefst klukkan 11.45 á morgun og verður í beinni á Sport 2 og HD.