Leikskólinn 101 opnar aftur - foreldrar ætla að halda börnunum heima

Eigandi Leikskólans 101 ætlar að opna skólann á nýjan leik í vikunni en hann hefur verið lokaður síðustu daga vegna rannsóknar á meintu harðræði starfsfólks við börn. Þetta kom fram á fundi með foreldrum á leikskólanum í kvöld.

Samkvæmt upplýsingum fréttastofu var mikil spenna í loftinu á fundinum, sem Ragnar Þorsteinsson sviðsstjóra hjá skóla- og frístundasviði Reykjavíkurborgar hélt utan um. Hulda Lind Stefánsdóttir, leikskólastjóri 101, var ekki á fundinum, en lögmaður hennar var þar fyrir hennar hönd.

Stjórnendur skólans og skóla- frístundasvið Reykjavíkurborgar tóku þá ákvörðun fyrir fimm dögum að loka skólanum á meðan rannsókn stæði yfir.

Á fundinum í kvöld tilkynnti lögmaður Huldu Lindar að skólinn verði opnaður aftur á fimmtudaginn næstkomandi. Það virtist koma framkvæmdastjóra Barnaverndar Reykjavíkur og Ragnari hjá Reykjavíkurborg á óvart að sú ákvörðun hafi verið tekin, eftir því sem fréttastofa kemst næst.

Gerð var óformleg könnun á meðal þeirra foreldra sem voru á fundinum, en þeir voru um 60 talsins. Það var einn sem rétti upp hönd þegar spurt var hversu margir myndu fara með barnið sitt á leikskólann á fimmtudaginn.

Foreldri á leikskólanum sem fréttastofa ræddi við í kvöld segir að engin úrræði hafi verið kynnt fyrir foreldrum, önnur en þau að starfsfólk á vegum Reykjavíkurborgar höfðu hringt í einkaleikskóla og dagforeldra til að athuga hvar væru laus pláss.