Barnaverndarnefnd Reykjavíkur hefur óskað eftir lögreglurannsókn á því hvort starfsmenn ungbarnaleikskólans 101 Reykjavík hafi brotið gegn barnaverndarlögum.

Þetta kemur fram í tölvupósti sem framkvæmdastjóri Barnaverndar sendi foreldrum barna á leikskólanum rétt í þessu.

Eins og fram kom á Vísi í morgun komust myndböndin sem sýna meint ofbeldi gegn börnunum ekki í hendur barnaverndar fyrr en í gærkvöld.

Tveir sumarstarfsmenn á leikskólanum tilkynntu ofbeldið til barnaverndar í vikunni. Þær sögðust eiga myndbönd í fórum sínum þar sem ung börn væru rassskelt og þau beitt harðræði. Myndböndin skiluðu sér ekki inn til barnaverndar fyrr en í gærkvöldi.

Halldóra Dröfn Gunnarsdóttir, framkvæmdastýra Barnaverndar Reykjavíkur, staðfestir þetta og sagði í samtali við fréttastofu að foreldrum sem eiga börn á myndbandi hafi verið gert viðvart og að myndböndin verði skoðuð með þeim í dag.

Í kvöldfréttum Stöðvar tvö í gærkvöld var greint frá því að rannsóknin í máli leiksskólans hafi ekki ratað inn á borð lögreglu. Leikskólinn er enn lokaður.