Haukur skoðar heiminn á Vísi

Haukur skoðar heiminn heita nýir sjónvarpsþættir sem sýndir verða á Vísi í vetur. Þar mun Haukur Viðar Alfreðsson, söngvari í Morðingjunum og blaðamaður á Vísi, skoða nærumhverfið með sínum hætti.

„Ég ætla að skoða og rannsaka alla króka og kima íslensks samfélags. Ég er ekkert að finna upp hjólið þannig að þetta verður bara létt og skemmtilegt. Ég er að fara að sprella yfir mig," segir Haukur Viðar.

Fyrsti þátturinn af Haukur skoðar heiminn fer í loftið hér á Vísi á mánudaginn kemur. Þá mun Haukur Viðar frumflytja lag sem hann samdi fyrir undankeppni Eurovision.

Hann fékk fjölda söngvara til liðs við sig og tók lagið upp örfáum klukkustundum áður en skilafresturinn rann út. Spurningin er hins vegar hvort Haukur hafi farið of seint af stað? Kemst lagið hans til skila?

Fylgist með á Vísi á mánudaginn þegar för Hauks um heiminn hefst.