Cazorla frá keppni vegna ökklameiðsla

Arsene Wenger, knattspyrnustjóri Arsenal, verður án miðjumannsins Santi Cazorla næstu vikurnar.

Arsenal vann 3-1 sigur á Sunderland í ensku úrvalsdeildinni í gær. Athygli vakti að Spánverjinn var ekki í leikmannahópi Lundúnaliðsins. Wenger útskýrði málið í leikslok.

„Cazorla á við ökklavandamál að stríða og verður frá í nokkrar vikur. Ég á ekki von á að hann spili fyrir næsta landsleikjahlé,“ sagði Wenger. Næstu landsleikir eru um miðjan október.

Olivier Giroud haltraði meiddur af velli í Sunderland í gær. Hann hafði áður skorað fyrsta mark Arsenal í leiknum.

„Ég hef áhyggjur af því enda er hópurinn þunnur í augnablikinu. Hann er meiddur á hné,“ sagði Wenger óviss um alvarleika meiðslanna.