Hallbera: Fór að fá gæsahúð á 90. mínútu

Óskar Ófeigur Jónsson skrifar 17. júlí 2013 22:00

Hallbera sést hér fyrri miðju. Mynd / óskaró

Hallbera Guðný Gísladóttir er búin að vera mjög traust í vinstri bakverðinum á Evrópumótinu í Svíþjóð og hún lagði síðan upp sigurmark Dagnýjar Brynjarsdóttur í 1-0 sigrinum á Hollandi í kvöld. Íslenska liðið tryggði sér með sigrinum sæti í átta liða úrslitunum.

„Ég á eftir að leggjast á koddann í kvöld og hugsa aftur um þetta mark. Það er frábært að geta tekið þátt í því að skjóta liðinu áfram í átta liða úrslit," sagði Hallbera um stoðsendinguna sína sem var frábært. Stoðsendingin kom í fyrri hálfleik þegar íslenska liðið spilaði frábærlega.

„Það var frábært að vera inn á í fyrri hálfleiknum. Við vorum rólegar á boltanum og náðum góðu spili. Það var aðeins meiri einstefna á markið okkar í seinni hálfleik en ég held að það sé bara eðlilegt þegar lið er 1-0 yfir og veit að það er nóg," sagði Hallbera.

Hallbera spilaði lengi með Dagnýju hjá Val og hefur því lagt upp nokkur mörk fyrir hana. „Ég man ekki hvað hún hefur skorað mörg mörk með landsliðinu en hún hefur skorað áður eftir fyrirgjöf frá mér," sagði Hallbera Guðný.

„Við vorum margar farnar að horfa á klukkuna á 70. mínútu því það lá stanslaust á okkar mark. Þegar það var komið fram yfir 90 mínútu og maður heyrði í íslensku áhorfendunum þá var maður farinn að fá smá gæsahúð," sagði Hallbera og bætir við: „Það er ekki hægt að lýsa því hvernig tilfinning það var þegar dómarinn blés loksins í flautuna," sagði Hallbera.

„Það voru ekki margir sem voru að setja pening á það að við kæmumst upp úr þessum riðli enda var þetta erfiður riðill til að vera í. Við erum búnar að fá sanngjarna gagnrýni í ár því við vorum ekki búnar að spila vel fyrir þetta mót. Við sýndum bara loksins í hvað okkur býr," sagði Hallbera.

„Við eigum ekki að vera að toppa í janúar eða febrúar. Nú er draumurinn að toppa ennþá meira og jafnvel ná að stríða liðinu sem við fáum í átta liða úrslitunum," sagði Hallbera en það verður annaðhvort Svíþjóð eða Frakkland.

„Þetta eru mjög góð lið og tvö lið sem eru líkleg til að vinna mótið. Það væri frábært að fá að mæta Svíum á heimavelli, spila fyrir framan fullan völl og bara vinna þær," sagði Hallbera kát.

Mest lesið

Fleiri fréttir