Serena biðst afsökunar á umdeildum ummælum

Afar umdeild grein birtist í Rolling Stone-tímaritinu á dögunum. Greinin var um tenniskonuna Serenu Williams en blaðamaður tímaritsins var með henni á snyrtistofu og þar féllu vafasöm ummæli.

Bæði um tenniskonuna Mariu Sharapovu sem og um fórnarlamb nauðgunar í Steubenville í Ohio.

"Ég er ekki að kenna stelpunni um en ef þú ert 16 ára og drukkin þá áttu ekki að þiggja drykki frá ókunnugum. Af hverju er 16 ára stelpa svo drukkin að hún man ekkert? Hún hefði ekki átt að koma sér í þessa aðstöðu," sagði Serenu en ummælin hafa gert allt vitlaust. Hún hefur nú beðist afsökunar á þeim.

"Ég biðst afsökunar á öllu í þessari grein. Ég þekkti ekki alla fleti málanna sem ég tjáði mig um og það er ófaglegt af mér. Ég hef talað við fjölskylduna í Steubenville og við áttum gott spjall. Ég mun halda áfram að tala við stelpuna og móður hennar."

Serena talaði einnig illa um Sharapovu og ástarlíf hennar. Hún hefur hitt Sharapovu og beðist afsökunar á ummæum sínum.