Þjóðir heims "kikna" undan flæði fíkniefnaeftirlíkinga

Fíkniefnanefnd Sameinuðu þjóðanna segir þjóðir heims enga stjórn hafa á eftirlíkingum af ólöglegum fíkniefnum sem eru framleidd til að annast eftirspurn eftir vímu á lögmætan hátt. Þetta kemur fram í nýrri skýrslu nefndarinnar.

Í skýrslunni segir að nú séu í fyrsta sinn til fleiri eftirlíkingar af ólöglegum fíkniefnum en fíkniefnin sjálf. Eftirlíkingarnar eru nú fleiri en 300 talsins.

Eftirlíkingarnar, sem á ensku kallast legal high, hafa skotið upp kollinum í 70 af 80 löndum sem könnun fíkniefnanefndarinnar nær til. Sumstaðar eru eftirlíkingarnar komnar með mikla markaðshlutdeild.

Nýjar tegundir eftirlíkinga séu nú farnar að skjóta upp kollinum svo hratt að hið alþjóðlega bann á fíkniefnum sé nú að kikna undan álaginu í fyrsta sinn síðan því var komið á fótinn árið 1961.

Þá er varað við því í skýrslunni að eftirlíkingarnar sem eru víða löglegar séu gjarnan mun hættulegri en upprunalegu fíkniefnin á borð við kókaín og kannabis, en neysla þeirra hefur ekki dregist saman þó að eftirlíkingarnar séu nú komnar á markað.

Eftirlíkingar eru nú vinsælastar á eftir kannabisefnum á meðal 17 og 18 ára unglinga í Bandaríkjunum, en þar í landi segjast 11% aðspurðra hafa prófað einhverskonar eftirlíkingu.

„Þessi lyf eru markaðssett sem „lögleg víma" og löglegar eftirlíkingar. Þessi hughvarfalyf eru að ryðja sér til rúms með sláandi hraða og hafa í för með sér ófyrséð heilsufarsvandamál," segir Yury Fedotov í samtali við The Guardian. Hann hvetur til samþættra aðgerða til að koma í veg fyrir framleiðslu, dreifingu og misnotkun lyfjanna.

„Þetta er erfitt vandamál, en lyfin eru lögleg. Þau eru seld fyrir opnum tjöldum, til dæmis á netinu. Þetta eru hughvarfalyf þar sem hætturnar eru ekki þekktar, en þær geta verið mun alvarlegri en með hefðbundnu fíkniefnin."

G8 ríkin komust að samkomulagi á fimmtudaginn til að takast á við vandann. Samkomulaginu er ætlað að auðvelda upplýsingaskipti um hin nýju efni, til dæmis hvað varðar áhrif á heilsu og upplýsingar um dreifingarleiðir.

Þetta kemur fram á vef The Guardian.