Segja Iago Aspas hafa samið við Liverpool

Spænska dagblaðið Marca fullyrðir að Liverpool hafi samið við spænska sóknarmanninn Iago Aspas hjá Celta Vigo. Ekki verði þó greint frá félagaskiptunum fyrr en í næstu viku.

Kaupverðið á sóknarmanninum er sagt vera 9,5 milljónir evra eða sem nemur um 1,5 milljarði íslenskra króna. Hann er með klausu í samningi sínum um að hann megi fara berist tíu milljóna evra boð í hann. Falli liðið um deild lækkar upphæðin í sjö milljónir evra.

Spænska úrvalsdeildin í knattspyrnu er enn í gangi en síðast umferðin fer fram á laugardaginn. Celta Vigo á í harðri fallbaráttu og gæti fallið þótt liðinu tækist að leggja Espanyol í lokaumferðinni. Liðið vann lífsnauðsynlegan sigur á Real Valladolid í næstsíðustu umferðinni og var Aspas á skotskónum.

Aspas hefur skorað 12 mörk í 33 deildarleikjum með Celta Vigo í vetur.