Hárblásarinn hans Sir Alex fær alla forsíðu The Sun á morgun

The Sun fjallar eins og aðrir fjölmiðlar í heiminum ítarlega um þá ákvörðun Sir Alex Ferguson að hætta sem knattspyrnustjóri Manchester United eftir þetta tímabil. Það er hinsvegar óhætt að segja að forsíða The Sun á morgun skeri sig úr.

Forsíða The Sun í fyrramálið hefur þegar vakið mikla athygli þrátt fyrir að blaðið sé enn í prentun en það er löngu orðið þekkt að menn á þessu blaði fara alltaf frumlegar leiðir þegar kemur að því að setja fram fréttir sínar.

Sir Alex á forsíðuna á morgun en það er þó aðeins lítil mynd af hinum 71 árs gamla stjóra United á forsíðunni. Sir Alex er þekktur fyrir að lesa yfir leikmönnum sínum og slíkum þrumuræðum hefur verið líkt við það að lenda í hárblásara.

Það er því hárblásarinn hans Sir Alex Ferguson sem fær heiðurskveðju á forsíðu The Sun á morgun. Þar sést hann kominn upp á snaga eftir 27 tímabila þjónustu við karlinn.

Sir Alex Ferguson vann alls 13 meistaratitla með lið Manchester United og lið undir hans stjórn (St. Mirren, Aberdeen og Manchester United) unnu alls 49 titla á hans frábæra stjóraferli.