Föst á Hólmavík í tæpa tvo sólarhringa | Einstakir ljúflingar á Hólmavík

„Við erum í Reykjanesi sem stendur og svo er förinni heitið heim á Ísafjörð," segir Birna Lárusdóttir. Þrettán manna hópur hélt frá Hólmavík vestur á Ísafjörð síðdegis í dag eftir tæplega tveggja sólarhringa dvöl á Hólmavík.

Birna var ein nokkurra foreldra sem fylgdu börnum sínum á körfuboltamót til Keflavíkur um liðna helgi. Bílalestin hélt heim á leið á sunnudaginn og hafði veðrið verið þokkalegt þegar kom að Steingrímsfjarðarheiðinni.

„Við mættum meira að segja snjómoksturstæki á leiðinni upp á heiðina," sagði Birna og ítrekaði að reyndir ökumenn hefðu ekið bílunum. Þau hefðu haft upplýsingar um veður en það hefði svo breyst á svipstundu.

Hópurinn lagði á heiðina um sjö leytið á sunnudagskvöldið. Tveir bílanna náðu alla leið heim á Ísafjörð, þrír náðu í Reykjanes en þrír sátu fastir þar til meðlimir Dagrenningar, björgunarsveitarinnar á Hólmavík, kom þeim til bjargar um þrjú leytið aðfaranótt mánudags.

Yngsta barnið í hópnum tvegga ára

Að sögn Birnu var yngsta barnið í hópnum aðeins tveggja ára. Ástandið var þó furðu gott í bílnum en varð þó mun betra þegar Ragnheiður Ingimundardóttir, aðstoðarhótelstýra á Hótel Finni á Hólmavík, tók á móti þeim ofan af heiðinni.

Vel hefur farið um þrettán manna hópinn á Hólmavík og hafði Birna á orði að um kærkomið aukafrí hefði verið að ræða. Heimamenn hefðu verið afar gestrisnir og nefndi Birna Vigni Pálsson rafvirkja sérstaklega til sögunnar.

„Ragnheiður útvegaði okkur líka vöfflujárn og DVD-myndir," sagði Birna í skýjunum með gestrisni heimamanna.

Bílarnir sátu fastir á heiðinni þar til síðdegis í dag. Þeir voru allir rafmagnslausir þegar komið var að þeim en fóru allir í gang fyrir rest. Birna og fjölskylda voru komin í Reykjanes og ætluðu að fá sér að borða þegar undirritaður heyrði í henni hljóðið um sex leytið.

Allt er gott sem endar vel

Fjölnir Ásbjörnsson, sóknarprestur úr Holti í Önundarfirði, var í hinum bílnum sem staðsettur var í Reykjarnesi á leiðinni heim.

„Nú er þetta allt að leysast.Það var leiðinlegt á Steingrímsfjarðarheiðinni en ekkert í líkingu við á sunnudagskvöldið. Ekkert ofsaveður," sagði Fjölnir.

„Við höfum kynnst góðu fólki á Hólmavík. Við tölum bara um að úr hafi orðið óvænt vetrarfrí," sagði Fjölnir. Hann tekur undir orð Birnu að heimamenn hafi reynst hópnum afar vel.

„Já, þetta eru einstakir ljúflingar."

Birna segist að sjálfsögðu munu skella sér á Nettómótið árlega í Reykjanesbæ að ári. Það verði þó að koma í ljós hvort foreldrar annarra barna sem voru í hópnum treysti þeim fyrir börnunum á nýjan leik eftir þessa reynslu. Nokkrir bílar fóru yfir heiðina í gærkvöldi og fengu fjögur börn annarra foreldra far með þeim heim á Ísafjörð í gærkvöldi.