"Van Persie var aldrei á leiðinni til City"

Sir Alex Ferguson, knattspyrnustjóri Manchester United, hefur sett ofan í Roberto Mancini, kollega sinn hjá grannliðinu City. Ferguson segir að Hollendingurinn hafi aldrei verið á leiðinni til félagsins.

City sækir United heim í stórleik 31. umferðar ensku úrvalsdeildarinnar sem sýndur er í beinni útsendingu á Stöð 2 Sport 2 í kvöld. Flestir telja United þegar vera búið að tryggja sér titilinn en liðið vann dramatískan sigur í fyrri viðureign liðanna á Etihad-leikvanginum.

Mancini lét hafa eftir sér í viðtali í síðustu viku að fimmtán stiga forskot United í deildinni væri Robin Van Persie að þakka. Van Persie hefur skorað 19 mörk í deildinni í vetur eftir 24 milljóna punda söluna frá Arsenal í ágúst.

Mancini var einnig á höttunum eftir Hollendingnum sem ákvað á endanum að ganga í raðir Rauðu djöflanna. Ferguson hefur stráð salti í sár Mancini með ummælum sínum. Aðspurður hvort City hefði verið sterkara með Van Persie innanborðs sagði Ferguson:

„Menn geta velt því fyrir sér en hann hefði aldrei farið til City."

Van Persie hefur lítið skorað undanfarnar vikur og á sama tíma hefur United helst úr lestinni bæði í enska bikarnum og Meistaradeildinni. Í báðum keppnum fékk Van Persie úrvalsfæri á ögurstundu sem misfórust.

„Það er ekki bara Van Persie að þakka hve vel okkur hefur gengið. En jafnvel þegar hann skorar ekki spilar hann vel," segir Ferguson.