Villas-Boas vongóður vegna meiðsla Bale

Gareth Bale, leikmaður Tottenham, meiddist illa á ökkla í leiknum gegn Basel í Evrópudeild UEFA í kvöld. Andre Villas-Boas, stjóri Spurs, er vongóður um að meiðslin séu ekki eins slæm og þau litu út fyrir að vera.

"Hann er mjög þjáður en vonandi slapp þetta betur en á horfðist," sagði Villas-Boas en leikmaðurinn meiddist í uppbótartíma.

"Það er möguleiki á því að hann, ef við erum jákvæðir, að hann geti spilað gegn Man. City þann 21. apríl. Það þýðir að hann missir aðeins af tveimur leikjum."

Spurs sýndi karakter og vann sig til baka eftir að hafa lent 2-0 undir. Gylfi Þór Sigurðsson skoraði jöfnunarmark Spurs.