Skráir sig í fjarnám til að syngja með Björk

„Þetta verður í fyrsta sinn sem ég kem til New York svo ég er mjög spennt,“ segir Jóna G. Kolbrúnardóttir, ein af kórstúlkunum í Graduale Nobili en þær ferðast með Björk Guðmundsdóttur til New York í lok mánaðarins.

Eins og Fréttablaðið greindi frá í síðustu viku er Björk að fara með Biophiliu-tónleika sína til New York og eru tíu tónleikar fyrirhugaðir þar í borg í febrúar. Tónleikarnir fengu góða gagnrýni hér á landi í haust en stúlkurnar í kórnum eru þar í lykilhlutverki. „Við verðum í New York í fjórar vikur og búum á íbúðahóteli í Brooklyn-hverfinu,“ segir Jóna.

Jóna hefði átt að útskrifast frá Menntaskólanum við Hamrahlíð í vor en þurfti að skrá sig í fjarnám þessa önnina vegna ferðalaganna. „Það var aldrei spurning að fara í fjarnám enda er þetta frábært tækifæri sem maður verður að stökkva á. Ég átti líka bara einn áfanga eftir og skráði mig í fjarnám við Fjölbraut í Ármúla, þar sem það er ekki fjarnám í MH,“ segir Jóna sem ætlar sér að ná að útskrifast í vor þrátt fyrir ævintýrin fram undan.

Tónleikarnir verða haldnir á tveimur stöðum í New York, New York Hall of Science og Roseland Ballroom, en Jóna býst við að þær fái nú tækifæri til að skoða sig um í borginni á milli tónleika. „Við erum nokkrar sem ætlum að skoða söngskóla fyrir áframhaldandi söngnám og sjá hvort við finnum ekki góða söngkennara úti,“ segir Jóna sem býst alveg eins við því að þær fari einnig með Björk á flakk í sumar þar sem hún treður meðal annars upp á Hróarskelduhátíðinni. „Ég býst alveg við því en við einbeitum okkur alltaf að einni ferð í einu og núna er það New York.“ -áp