Stórafmæli hjá Hvanndals

Grallararnir í Hvanndalsbræðrum, eða Hvanndals eins og þeir kalla sig núna, fagna tíu ára afmæli sínu á þessu ári. Af því tilefni gefa þeir út sína sjöundu hljóðversplötu fyrir næstu jól og ætla jafnframt að vera duglegir við að spila á tónleikum og böllum. Rögnvaldur gáfaði, sem hætti í bandinu 2009, ætlar að spila eitthvað með fyrrverandi félögum sínum á árinu.

Afmælistónleikar verða haldnir í Hofi á Akureyri í október og einnig eru tónleikar fyrirhugaðir í Reykjavík. „Það verður öll flóran af spilurum sem hafa komið fram með okkur í gegnum tíðina,“ segir Valur Hvanndals um tónleikana á Akureyri. Hann segir engan bilbug að finna á Hvanndalsbræðrum og er hæstánægður með tíu ára afmælið. „Þetta er alveg ótrúlegt. Við reiknuðum ekki með að lifa lengur en í eitt eða tvö ár. En við erum hvergi nærri hættir. Þetta heldur okkur ungum.“

Fram undan er spilamennska á þorrablóti í Danmörku í febrúar og árshátíðum hér heima í framhaldinu. Fyrsta lagið af nýju plötunni kemur svo út í mars.

Hvanndalsbræður hafa á ferli sínum selt um níu þúsund plötur og bíða því margir spenntir eftir þeirra næstu afurð. -fb