Klipptur út úr fyrsta Skaupinu

„Þetta voru töluvert margar senur en ég er ekkert svekktur og skil mjög vel að þetta skyldi hafa verið gert. Auðvitað var leiðinlegt að sjá á eftir þessum atriðum enda í fyrsta skipti sem ég leik í Skaupinu,“ segir leikarinn Atli Þór Albertsson.

Flestöll atriði með leikaranum voru klippt út úr Áramótaskaupinu en Atli átti að leika Egil Einarsson eða Gillz. Honum bregður stuttlega fyrir í hlutverki Egils í einu af upphafsatriðum spéspegilsins, þá ber að ofan með hár á bringunni, þar sem sjónvarpsþátturinn Með okkar fallegu augum er kynntur til leiks. Þátturinn var gegnumgangandi í öllu Skaupinu en stjórnendur hans voru nafntogaðir einstaklingar á borð við Hildi Líf, Kristrúnu Ösp og Tobbu Marinós.

„Upphafsatriðið var ekki alveg eins og það átti að vera en ég veit ekkert hvernig það var klippt til.“ Að sögn Atla voru þetta töluvert margar senur, þar á meðal ein þar sem hann stendur, ber að ofan, að taka viðtal uppi á Hellisheiði í skítakulda. Ákvörðun um að klippa út grínatriði með persónu Egils Einarssonar var tekin eftir að sjónvarpsmaðurinn var kærður ásamt kærustu sinni fyrir nauðgun. Rannsókn á því máli er nú á lokastigi. - fgg