Iceland Food Centre ókeypis á netinu

Sjónvarpsmaðurinn Þorsteinn J. vonast til að koma heimildarmynd sinni Iceland Food Centre að í Norðurlöndum og í Þýskalandi og er um þessar mundir að láta þýða hana yfir á ensku og þýsku.

Sem liður í að opna augu almennings og fagaðila fyrir myndinni getur fólk horft á hana ókeypis á heimasíðu hans thorsteinnj.is. Myndin fjallar um fyrstu íslensku útrásina þegar íslenska ríkið ásamt fleirum stofnaði veitingastað í miðborg London árið 1965. Hún var frumsýnd á Stöð 2 um páskana á síðasta ári.

„Það eru eiginlega þrjár ástæður fyrir þessari frísýningu," segir Þorsteinn J. „Sú fyrsta er sú að það er bráðnauðsynlegt fyrir okkur sem þjóð að skilja söguna og læra af henni. Ef fólk vill fá botn í hvað í ósköpunum hefur verið að gerast í íslensku samfélagi síðustu ár, þá verður það hreinlega að sjá þessa mynd.

Myndin er líka styrkt af Kvikmyndamiðstöð Íslands. Sú stofnun er rekin með framlögum frá hinu opinbera. Þess vegna er bara sjálfsagt og eðlilegt að allir landsmenn eigi þess kost að sjá myndina.

Þriðja ástæðan er svo sú að það líður að Edduverðlaununum í febrúar.

Það skiptir miklu fyrir dreifingu þessarar myndar erlendis að hafa einhvers konar merkimiða á henni ef þess er kostur," segir Þorsteinn og vonast til að þessi ókeypis sýning á heimasíðu hans eigi eftir að falla vel í kramið hjá landsmönnum. - fb