Verst nærbuxnatökum

Rokkaradóttirin Kelly Osbourne hefur ýmis brögð uppi í erminni til að koma í veg fyrir að papparassa-ljósmyndarar nái myndum af hennar allra heilagasta. Í sjónvarpsviðtali nýverið lýsti Osbourne reynslu sinni af ljósmyndurum sem hreinlega leggjast á hnén gagngert til að ná myndum af nærbuxum til að selja slúðurblöðum. „Þeir eru stundum svo svæsnir að þeir leggjast á hnén til að ná góðu skoti upp pilsfaldinn hjá manni. Besta vörnin er að sparka í átt til þeirra. Þá láta þeir þetta svæði vera,“ segir Osbourne, sem hefur þó skilning á starfi ljósmyndaranna. „Þetta er fylgifiskur frægðarinnar og það hjálpar að vera almennilegur við þá. Þetta er nú einu sinni vinnan þeirra, þótt við hötum þetta.“

Frægar konur á borð við Britney Spears, Kate Hudson, Lindsay Lohan og Sienna Miller hafa orðið fyrir barðinu á nærbuxnamyndatökum papparassa-ljósmyndara. Mesta hættan á slíkum myndum ku myndast þegar viðkomandi stígur út úr bíl.