Auðmjúkur gagnvart verkinu

Þormóður Dagsson og hljómsveit hans Tilbury hafa tekið upp ábreiðu af lagi Nýdanskrar, Á sama tíma að ári. Útgáfa Tilbury hljómar í samnefndri leiksýningu sem verður frumsýnd á næstunni í Borgarleikhúsinu.

„Það er verið að setja þetta leikrit upp í þriðja sinn. Við vorum fengnir til að endurútsetja og taka upp lagið aftur. Þetta var mjög gaman. Þetta er í fyrsta skipti sem við fáum að gera eitthvað svona,“ segir Þormóður. „Ég var voða auðmjúkur gagnvart verkinu. Maður vill ekki fara illa með það en vill samt leyfa sér að gera ýmsa hluti.“

Soffía Björg Óðinsdóttir úr hljómsveitinni Brother Grass syngur á móti Þormóði í laginu en í upphaflegu útgáfunni söng höfundurinn Björn Jörundur Friðbjörnsson á móti Margréti Vilhjálmsdóttur.

Vinsælasta lag Tilbury til þessa, Tenderloin, var fyrir skömmu valið lag dagsins á útvarpsstöðinni KEXP í Seattle, sem hefur verið í samstarfi við Airwaves-hátíðinni undanfarin ár. „Þetta kemur laginu í fleiri eyru, sem við erum óskaplega ánægðir með. Þetta er voðalega flott stöð sem vill vera með puttann á púlsinum.“- fb